Sa ating Presidente Benigno Aquino III, Bise Presidente Jejomar Binay; mga dating Pangulong Fidel Valdez Ramos at Joseph Ejercito Estrada; Senate President Franklin Drilon at mga miyembro ng Senado; Speaker Feliciano Belmonte Jr. at mga miyembro ng Kamara de Representante; Chief Justice Maria Lourdes Sereno at ang ating mga mahistrado ng Korte Suprema; mga kagalang-galang na kagawad ng kalipunang diplomatiko; mga miyembro ng Gabinete; mga opisyal ng lokal na pamahalaan; mga kasapi ng militar, pulis, at iba pang kawani mula sa ating unipormadong hanay; mga kapwa ko nagseserbisyo sa taumbayan; at ang mga minamahal kong kababayan, magandang araw sa inyong lahat.

KORAPSYON. Isa marahil sa pinakamabibigat na problemang kinakaharap ng ating gobyerno ay ang tila walang katapusang korapsyon. Bago nanumpa si Benigno Aquino III bilang Pangulo ng Pilipinas noong 2010, isinulong niya ang ang "Daang Matuwid" na naglalayong ituwid ang katiwalian sa gobyerno at iba pang sangay nito, ngunit para bang nalimot na ni PNoy ang pangakong minsan niyang isinulong, magiging isa na rin ba ito sa mga pangakong napako o kaya'y mabibigyan pa ito ng solusyon ng administrasyon ni PNoy sa nalalabi nitong anim na buwan sa panunungkulan? Oh, Pangulong Aquino, nasaan ka nang kailangan ka ng sambayang Pilpino?

Taong 2013, naging mainit ang isyu sa pork barrel scam nang mabunyag ang P10 billion pesos pork barrel scam na kinasangkutan ng JLN Group na pag-aaari ni Janet Lim-Napoles. Si Janet Lim-Napoles, ang tinaguriang "Pork Barrel Queen" ay kasalukuyang nakakulong sa New Bilibid Prison at sinentensyahan ng habambuhay na pagkakakulong. Habang napapanahon ang balita, nasaan na nga ba ang Pangulo? Bago pa man lumantad ang pork barrel scam, maraming humihiling na tanggalin na ang Priority Development Assistance Fund (PDAF) o ang pork barrel ng mga mambabatas. Ngunit mahirap basta na lamang tanggalin ang pork barrel, dahil sa marami ang tumututol dito. Kahit pa ang mga resulta sa poll at mga sarbey ay tumutugon na tanggalin na ito. Unang tumututol dito ay ang mga mambabatas. Isa pa sa pangunahing dahilan kung bakit hindi ito madaling matanggal ay dahil hindi pabor si Pangulong Aquino sa abolisyon nito. Kung kontra ang pangulo, tiyak na mahirap nga itong buwagin. Ngayon, hinahamon ko ang ating Pangulong Aquino na kung wala siyang itinatagong baho sa likod ng pork barrel scam, buwagin niya ito at hindi na muling bigyan pa ng badyet ang mga mambabatas- nangunguna sa pagkalkal ng pera sa kaban ng bayan. Kung totoo ngang hindi korap ang mga kasapi ng pamahalaan, bakit hindi nila isinisiwalat ang kanilang totoong Statement of Assets, Liabilities and Net Worth (SALN) at bakit ginagawang "over-priced" ang mga proyekto nila? Nakakahiyang sabihin pero palpak ang naging simula ng daang matuwid, hindi maayos na nasolusyonan ang mga problema ng bansa, maraming isyu ang mga ahensiya ng gobyerno, tulad halimbawa ng napapanahong isyu ng Bureau of Costums na pilit nilulustay ang pera at kakarampot na padala ng ating mga OFW na nagbuwis ng dugo at pawis para lang mapuno ang balikbayan box na laan para sa naiwang pamilya sa Pilipinas. Hindi maikakaila na ang kahirapan ang nagiging dulot ng korapsyon sa ating bansa. Tila patuloy na lumalaganap ang kahirapan sa Pilipinas, nahaharap tayo sa matinding krisis. Nasaan ka nga ba Pangulo Aquino? Nakaupo sa upuan ng iyong silid-tanggapan o baka naman ay patuloy na naghahanap ng iyong First Lady na kailanman ay hindi na darating pa?

Sa aking pagtatapos, isang kanta sana ang aking gustong i-alay kay PNoy. "Tao po na nakaupo, subukan niyo namang tumayo at baka matanaw, at baka matanaw ninyo ang tunay na kalagayan ko," ito ay mula sa kanta ni Gloc 9 na nagpapagising sa mga natutulog na puso ng pamahalaan at pinapakita ang realidad ng buhay. Ipinapakita dito ang malaking agwat ng mayayaman at mahihirap sa ating bayan. Ang mensahe ng kanta ay nakasentro sa napakalaking isyu ng kahirapan sa ating bansa. Binibigyang diin rin dito kung gaano kalaki ang epekto ng korapsyon at kahirapan sa Pilipinas. 
Magandang araw at nawa'y pagpalain ng Diyos Ama ang sambayanang Pilipino.